कक्षा नौ पाठ तीन करेसाबारी

 

 पाठ :- ३   करेसाबारी                          शिक्षक :- दिनेश खत्री

 

शब्दभण्डार

१ दिइएका शब्द र तिनका अर्थबिच जोडा मिलाउनुहोस् :

            शब्द                   अर्थ

       गुणस्तरीय           गुणस्तर राम्रो भएको

      गोडमे               बोटबिरूवाका वरिपरि भएका झारपात उखेल्ने वा गोड्ने काम

      खाडल              खाल्टो

       बाली              कृषिउपज

       लट्टे                सागको एक प्रकार

२  दिइएका विभिन्न क्षेत्रमा प्रयोग हुने प्राविधिक तथा पारिभाषिक शब्द पढ्नुहोस् र तिनका अर्थ बारे छलफल गर्नुहोस्  :

                             कानुन

अधिवक्ता   :-  न्यायालयमा वादी वा प्रतिवादीका पक्षमा वकालय गर्ने अधिकार प्राप्त व्यक्ति वा विशेषज्ञ ,  अधिकृत तहको कानुन व्यवसायी ।

मुचुल्का :-  सरजिमिन हुँदा कसैले कुनै कामकारबाही भएवापत आफूले जानेसुनेको बयान लेखिदिएको कागज,  सरजिमिनको मानिसहरूले लेखिएको बयानको कागज ।

वारेस :-  वारिस, वादी वा प्रतिवादीका तर्फबाट अदालती प्रक्रियाका लागि अधिकार पाएको व्यक्ति

तारिख :- अड्डा अदालतबाट झगडिया वा निजको वारिसलाई हाजिर हुन आउन भनी लेखिएको मिति, ,अङ्ग्रेजी महिनाको दिन वा गते, मिति

बिगो :- कसैले अनुचित किसिमले लिएको धनमाल वा सो धनमाल दाबी गरिएको निश्चित र अपराध , कसुर र दोष सम्बन्धि मामिलामा प्रभाव पार्ने कुनै पनि रकम, बिगार, निहुँ

जमानत :- धितो, धरौटी, मुद्दामामिलामा मुछिएको व्यक्तिलाई चाहेका बेला उपस्थित गराउने सर्तमा सम्बन्धित अड्डामा धरौटी राखी वा व्यक्तिले जमानी बसी छुटाउने काम

 

प्रशासन

दर्ता:- कुनै कार्यालयमा औपचारिक रुपमा आएका चिठी, कागजात आदि दर्ता किताबमा दर्ने वा चढाउने काम, दराइ, रजिस्टेसन वा पञ्जीकृत गर्ने गराउने काम

चलानी :- चलान गरेका व्यक्ति , वस्तु आदिको नामनामेसी लेखिएको निस्सा वा पुर्जी, विवरणपत्र चलान गरिएको

टिप्पणी :- कठोर वा गूढ अर्थको व्याख्या , विशेष कुरा सम्झाउन टिपिने सानो लेख, कुनै कार्यका बारेमा प्रकट गरिने विचार

सरुवा :- एक ठाउँबाट अर्को ठाउँमा सरेर आएको , सर्ने किसिमको, धेरै धान भएको चामल,विखालु तेल आउने कदम

बढुवा :- (बढ्ने किसिमको, सप्रने जातको, ) तल्लो पदबाट माथिल्लो पदमा वृद्धि हुने काम, पदोन्नति, प्रोत्साहन

परिपत्र:- विचार, सूचना जानकारी आदिका निम्ति सम्बन्धित धेरै  व्यक्ति, संस्था, अङ्ग विभागलाई एकै बोहोरामा पठाइने आधिकारिक पत्र

वाणिज्य

आयव्यय :- आम्दानी र खर्च, नाफा र नोक्सान , लाभ- हानी....

राजस्व :- मालपोत भन्सारमहसुल, विभिन्न कर वा शुल्क आदिका रुपमा राज्यलाई प्राप्त हुने धन

भौचर:- लेखा प्रणाली अनुसार आयव्यय विवरण प्रविष्ट गराउने फाराम

बेरुजु :- रुजु गर्दा नमिलेको, रुजु नगरिएको वा नभएको , बेरीतसँग भएको वा रीतभाँत नमिलेको

निकासी :- निकाशाको आदेश , कुनै वस्तु स्वदेशबाट विदेश पठाउने काम

फर्स्योट :- लेनदेन वा खरिदबिक्री सम्बन्धि हरहिसाब चुक्ता गर्ने काम, छिनाफाना , फछ्र्यौट

विज्ञान र प्रविधि

ऊर्जा :- बल, शक्ति, उत्साह , भोजन

संवहन :- दायित्व लिने काम, अभिभारा बोक्ने काम

तापक्रम :- उष्णता वा तातोपन घटीबढी हुने क्रम, सूर्यबाट प्राप्त हुने गर्मी

यौगिक :- दुई वा दुईभन्दा बढी वस्तु वा तत्व मिलेको, संयुक्त

विकिरण :- विभिन्न असाधारण किरण, छर्ने वा फिँजाउने काम, मार्ने काम,

रकेट :- अन्तरिक्षामा प्रक्षेपण गरिने मानवरहित वा मानवसहित यान, उपग्रहका रुपमा छोडिने यान, छिटो बेगिलो

वन

कटानी :- काट्ने वा फाँडने काम ,     फँडानी :- कटाउने, फाँड्ने काम

वृक्षारोपण :- बोटबिरुवा लगाउने वा रोप्न काम,   निकुञ्ज :- लहराहरू र बाक्लो रूखहरू भएको  ठाउँ , वन्य सम्पदाको सुरक्षाका लागि निर्माण गरिएको स्थल

आरक्ष :- वन्यजन्तुको सुरक्षा र रूख बिरुवाहरूलाई बचाउनका लागि जङ्गललाई चारैतिरबाट घेर्ने काम, आरक्षण   टाँचा :- कटानी गर्न अनुमति पाएका रूखमा लगाइने सरकारी छाप, हुलाकद्वारा पठाइने चिठीपत्रका टिकटमा लगाइने मितिसहितको छाप

शिक्षा

परीक्षा :- जाँच गर्ने काम, जाँच, जुँचाई, योग्यता, विशेषता, सामर्थ्य , गुण आदिको स्तर निर्णय गर्नका लागि ठीकसित पारख गर्ने काम , मूल्याङ्कन :- परीक्षार्थीहरुको उत्तरपत्र वा प्रयोगात्मक परीक्षाको अङ्कद्वारा स्तर तय गर्ने काम, कर्मचारीहरुको कार्य, योग्यता र विशिष्टता आदिको तौलाइ

छात्रवृत्ति :- अध्ययन अवस्थामा जीवननिर्वाहका निम्ति विद्यार्थीहरूलाई निश्चित समयसम्मका लागि दिइने रकम   पाठ्यक्रम :- पढाउनका निम्ति तोकिएको विषय र त्यसको पूर्वापरक्रम

पृष्टपोषण :- गल्ती , कमीकमजोरी हटाउन दिइने सल्लाह , सुझाव

 

साहित्य :

रस :- साहित्यको अध्ययनपछि प्राप्त हुने अनुभूति, नवरस     छन्द :- गति, यति र लय मिलेको वर्ण, मात्रा आदिको गणनाअनुसार पद्यात्मक रचना गरिने कुनै निश्चित मान वा रुप

अलङ्कार :- साहित्यशास्त्रको एक अङ्ग, अर्थगत वा शाब्दिक चमत्कारद्वारा साहित्यलाई सिँगारने तत्व भएको  विधा :-  काव्य वा साहित्यमा प्रचलित खासखास विषय , प्रकार वा किसिम( कथा, कविता , नाटक ......)    वाद :- तत्त्वदर्शीहरूले निश्चित गरेको कुनै विशिष्ट कुराको मत वा सिद्धान्त

दृष्टिविन्दु :- कुनै कृतिमा समाख्याताको स्थितिलाई जनाउने मुख्यतः चरित्र, कार्यव्यापार, परिवेश आदिको उपस्थापन पद्धति र कथनभूमिका

सञ्चार

प्रसारण :- व्यापक समाचार वा सन्देशलाई कुनै आकाशवाणी, रेडियो आदि कुनै साधनद्वारा वरपर पठाउने कार्य,   परिसंवाद :- दुइवा दुईभन्दा बढी व्यक्ति वा वक्ताबिचमा कुनै विषयमा हुने कुराकानी

इमेल :- विद्युतीत माध्यमको प्रयोग गरी पठाइने चिठी वा सूचना

सम्पादकीय :- सम्पादकको विचार वा भाव    दूरसञ्चार :- टाढाटाढासम्मका लागि समाचार सूचना आदिको आदानप्रदान गर्ने कार्य

समाचारपत्र :- अखबार , पत्रपत्रिका , समाचार प्रकाशनभएको

 

३ 'करेसाबारी' निबन्धबाट कृषि क्षेत्रमा प्रयोग हुने पाँच ओटा पारिभाषिक र प्राविधिक शब्द टिपी वाक्यमा प्रयोग गर्नुहोस् :

अर्गानिक :- मानव स्वास्थ्यका लागि अर्गानिक खाद्यवस्तु तथा तरकारी उत्पादनमा जोड दिनु आजको आवश्यकता हो ।

प्राङ्गारिक :- करेसाबारीमा लगाइने तरकारी बालीमा प्राङ्गारिक मलको प्रयोग गर्न पर्दछ ।

बारबन्देज :- करेसाबारीलाई राम्रोसँग बारबन्देज गरिएन भने तरकारीका बिरुवाहरू बाख्रापाठा र कुखुरा आदिले क्षति पुर्‍याउन सक्छन् ।

छाप्रो :- बिरुवालाई सुख्खा हुनबाट जोगाउन र तुषारो, शीत, वर्षा र तापक्रमबाट जोगाउन छाप्रो लगाउनु राम्रो हुन्छ ।

थाँक्रा :- लहरे बालीलाई थाँक्रा लगाउन सकेमा राम्रो उत्पादन लिन सकिन्छ ।

उत्पादकत्व :- बाली बिरुवाको उत्पादन वृद्धिका लागि माटोको उत्पादकत्व क्षमता बढाउनु पर्ने हुन्छ ।

बेर्ना :- तरकारी खेती गर्ने हरेक किसानले बेर्ना उमार्नेदेखि  सार्ने काममा विशेष ध्यान दिनुपर्छ ।

 

४ तल दिइएका शब्दलाई वाक्यमा प्रयोग गर्नुहोस् :

आत्मनिर्भर :- नेपाल कृषि प्रधान मुलुक भएर पनि खाद्यान्न तथा तरकारी एवम् फलफूलमा आत्मनिर्भर हुन नसक्नु दु:ख लाग्दो कुरा हो ।

कम्पोस्ट :- करेसाबारीमा तरकारी खेती लगाउँदा कम्पोस्ट मल बनाउने तरिका सिक्नु पर्छ ।

नर्सरी :- तरकारी बाली लगाउँदा कतिपय बिरुवाका लागि नर्सरीमा बेर्ना निर्माण गर्नुपर्छ ।

बिउबिजन :- तरकारी खेतीमा लाग्ने मानिसले बिउबिजनको उत्पादन भण्डारण तथा व्यवस्थापन सम्बन्धि ज्ञान हुनु अति आवश्यक हुन्छ ।

रासायनिक :- रासायनिक मलको प्रयोले बालीनाली उत्पादनमा वृद्धि त गर्न सकिन्छ तर यसले मानव शरीरका लागि हानिकारक हुन्छ ।

 

५ तल दिइएको निबन्धको अंश शिक्षकले  तोकेको समयका आधारमा द्रुत पठन गरी सोधिएको प्रश्नको उततर भन्नुहोस् :

क)   अनुच्छेदमा तरकारीलाई कुन कुन प्रकारमा वर्गीकरण गरिएको छ ?

उत्तर :- अनुच्छेदमा तरकारीलाई हिउँदे, वसन्ते र वर्षे तरकारीका रुपमा वर्गीकरण गरिएको छ ।

ख)   हिँउदे तरकारी बालीका लागि कस्तो मौसम आवश्यक हुन्छ ?

उत्तर:- भदौदेखि असोजसम्म बेर्ना रोपेर कात्तिकदेखि माघसम्म चिसो मौसम र छोटो दिन हिउँदे तरकारीको लागि उपयुक्त मौसम हो ।

ग)      तरकारी र वसन्ते तरकारीमा कस्तो भिन्नता पाइन्छ ?

उत्तर :- वसन्ते तरकारी पुसदेखि फागुनसम्म बीउ र बेर्ना रोपेर फागुनदेखि जेठसम्मउत्पादन लिइन्छ भने वर्षे तकारी वैशाखदेखि असारसम्म बीउ बेर्ना रोपी वर्षा हुने असारदेखि भदौसम्म उत्पादन लिन सकिन्छ ।

घ)     मानिसहरूले तरकारी खेती किन गर्छन् ?

उत्तर :- मानिसहरू भान्सामा तरकारीको आवश्यकता परिपूर्ति गर्नका साथै केही आर्थिक उत्पादनका लागि तरकारी खेती गर्ने गर्छन् ।

६. दिइएका प्रश्नहरूको उत्तर दिनुहोस् :

क) बाली विविधता भनेको के हो ?

उत्तर:- करेसाबारीमा थोरै जमिनबाट धेरै उत्पादन लिनका लागि खेती गर्नेले खेतीका लागि प्रविधिलगायत तरकारीको विविधताका बारेमा जान्नु आवश्यक छ । मुख्यबालीसँगै सहायक बाली पनि उत्पादन गर्न सकिन्छ । मुख्य बालीसँगै सहायक बाली लगाउँदा खेतीवालालाई दोहोरो फाइदा  हुन्छ । मौसमअनुसार विविध प्रकारका बाली लगाएमा फाइदा पनि राम्रो हुन्छ ।सधैँ गर्न सकिने र मौसममा मात्रै गर्न सकिने  बाली लगाइयो  भने रोगव्याधिबाट धेरै नोक्सान हुँदैन । बाली विविधता भनेको विविध प्रकारका बालीनाली लगाउनु हो । थोरै जमिनमा पनि विभिन्न प्रकारका बालीको खेतीबाट प्रशस्त मात्रामा तरकारी आयआर्जन गर्न सकिन्छ ।

ख) करेसाबारीमा तरकारी लगाउँदा जमिनको व्यवस्थापनमा ध्यान दिनुपर्ने पक्ष उल्लेख गर्नुहोस् ।

उत्तर :- करेसाबारीमा तरकारी लगाउँदा जमिनको व्यवस्थापन गर्नु जरुरी छ । एउटै जमिनमा पनि मुख्य बाली र घुसुवा बाली लगाएर फाइदा लिन सकिन्छ । जमिनको वरिपरि बारबन्देज नगरेमा गाईवस्तुले खेतीको नक्सानी गर्दछ । जमिनको तयारी गर्दा जमिनलाई राम्ररी खनजोत गरी माटो खुकुलो बनाउनुपर्छ । माटो खुकुलो र बुर्बुराउँदो भयो भने बालीनाली राम्ररी फस्टाउँछ ।सम्भव भएसम्म जङ्गलको माथिल्लो तहको माटो प्रयोग गरी माटामा प्राङ्गारिक मात्राको व्यवस्थापन गर्न सकिन्छ । चिम्ट्याइलो माटो भएमा प्रशस्त मात्रामा प्राङ्गारिक मलको प्रयोग गरेमा मात्र  माटो खुकुलो खनजोत गर्दा निस्केको बालीको अवशेषलाई जमिनमुनि गाडेर  बिरुवाका लागि खाद्यतत्व बनाउनु पर्दछ ।

करेसाबारी तरकारी खेती गर्दा जमिनको व्यवस्थापन सबैभन्दा महत्त्वपूर्ण मानिन्छ । करेसाबारीका लागि छुट्याइएको जमिनमा पर्खाल वा बाँसले बारबन्देज गर्नुपर्दछ । निश्चित स्थानमा कम्पोस्ट मालका लागि खाल्डो खन्ने , नर्सरीका लागि पारिलो वा घाम लाग्ने ठाउँ छुट्याउने, ससाना सुर्का बनाउने, सुर्काबीचमा बाटो राख्ने आदि कार्य गर्नुपर्दछ ।

ग) वानस्पतिक विषादीको निर्माण र प्रयोग गर्ने तरिका वर्णन गर्नुहोस् ।

उत्तर:-   करेसाबारी तरकारी खेतीलाई मानव स्वास्थ्य अनुकूल बनाउन यसमा प्रयोग हुने मल र विषादीको बारेमा सजग र सचेत हुनुपर्छ । करेसाबारीमा स्थानीय वातावरण र प्रविधिको प्रयोग गरी बनाइने कम्पोस्ट मल र विषादीको प्रयोग गर्नु पर्छ । करेसाबारीमा प्रयोग गरिने वानास्पतिक विषादीको निर्माण गर्दा तीतो, टर्रो, र कडा गन्ध आउने वनस्पतिलाई मलमुत्रमा राम्ररी कुहाएर गर्न सकिन्छ । स्थानीय वातावरणमा पाइने तितेपाती, निम, सिस्नु, मेवा, असुरो, धतुरो, बकाइनो,  खिर्रो बोझो, टिमुर, खर्सानी , सिमली आदिका पात वा मुन्टा जम्मा पारेर मसिनो टुक्रा बनाएर कालो रङको ड्रममा दुईतिहाई हुने गरी राख्ने र बाँकी भागमा गहुँत राखेर भर्नु पर्छ । यसरी भरिएको ड्रमलाई मौसम अनुसार २५-३५ दिनसम्म घाम लाग्ने ठाउँमा बिर्को राम्ररी बन्द गरेर राख्नु पर्छ ।ड्रमभित्र राम्ररी कुहिएर तयार भएको झोललाई छानेर बिरुवाको प्रकृतिअनुसार पानीमा मिसाई करेसाबारीमा प्रयोग गर्न सकिन्छ  । ठूलो बिरुवाको लागि एक भाग विषादीमा छ भाग पानी र ससाना बिरुवाका लागि एक भाग विषादीमा दस भाग पानी मिसाएर प्रयोग गर्नुपर्छ ।

८. व्याख्या गर्नुहोस् :

क) हरियो तरकारी फलेको दृश्यले घरको सौन्दर्य वृद्धि हुन्छ र वातावरण पनि स्वच्छ बन्न पाउँछ ।

उत्तर:- प्रस्तुत वाक्य हाम्रो कक्षा नौ को नेपाली किताबको पाठ तीन करेसाबारी निबन्ध शीर्षकबाट व्याख्याको लागि साभार गरिएको हो । यस निबन्धको रचयिता यसै किताबका सम्पादकज्यूहरू हुन् । यस निबन्धमा करेसाबारी खेतीको जानकारी साथै करेसाबारी खेतीबाट हुने फाइदा, करेसाबारी खेती गर्ने तरिका बारेमा जानकारी दिइएको छ । उक्त वाक्य करेसाबारी खेतीको जानकारी दिने क्रममा आएको हो ।

           वर्तमान समयमा व्यावसायिक तरकारी खेतीबाट उत्पादन हुने सागसब्जीमा बढी मात्रामा रासायनिक मल तथा विषादीको प्रयोग गरिएको हुन्छ । यस्ता खाद्यतत्वबाट मानिसमा विभिन्न प्रकारका रोगहरू बढ्दै गएका छन् । यस्ता रोगहरू बढ्दै जाँदा मानिसहरू रोगको सिकार भई दु:खपूर्ण जीवन बाँच्नु परेको स्थिति छ ।त्यसैले यस्ता रोगबाट मुक्त हुन करेसाबारीमा खेती गर्नु पर्छ ।घर वरिपरीको खाली जग्गामा तरकारी खेती गरेर स्वास्थ तरकारी खाई निरोगी बन्नु आजको आवश्यकता हो । भूगोल र मौसमअनुसारका बालीका विभिन्न प्रजातिका तरकारी करेसाबारीमा मिलाएर लगाउनु पर्छ । यस्ता कार्यबाट हामीले आफ्नै बारीको ताजा , गुणस्तरीय र अर्गानिक तरकारी सेवन गरी स्वास्थ बन्न सक्छौँ । तरकारी उत्पादनले परिवारको आवश्यकता  पनि पूरा हुन्छ भने घर वरिपरि लगाइएको तरकारीले घरको सौन्दर्य पनि बढाउँछ । करेसाबारीमा गरिने खेती पूणत: प्राङ्गारिक मलमा आधारित हुने भएकाले यसले वातावरणीय सन्तुलनमा सहयोग समेत पुग्दछ ।

         निष्कर्षमा के भन्न सकिन्छ भने घरको सौर्न्दर्य बढाउन र वातावरणलाई सन्तुलन राख्न करेसाबारीमा अर्गानिक खेती गरी स्वस्थ बनौँ भन्ने मूल कुरा पनि यस निबन्धमा सरल सहज भाषाशैलीमा व्यक्त गरिएको छ ।

९. दिइएका प्रश्नको विवेचनात्मक उत्तर लेख्नुहोस् :

क) करेसाबारीमा मलखाद प्रयोग , सिंचाइ र गोडमेलका बारेमा पाठमा व्यक्त विषयवस्तुप्रति आफ्ना धारणा व्यक्त गर्नुहोस् ।

उत्तर :-  घरको वरिपरि गरिने खेतीलाई करेसाबारी खेती भनिन्छ । घर वरिपरिको खाली जग्गाको सदुपयोगका लागि यो खेती गर्नुपर्दछ । करेसाबारीको खेतीबाट आफूलाई चाहिने तरकारी  प्रशस्त मात्रामा उत्पादन गर्न सकिन्छ भने हामीलाई चाहिने स्वस्थ , ताजा र अर्गानिक तरकारी सेवनबाट हामी विभिन्न रोगबाट वचन सक्छौँ ।

             करेसाबारीमा तरकारी खेती गर्दा मलखादको प्रयोग , सिंचाइ र गोडमेलमा विशेष ध्यान दिनुपर्छ । माटोको उत्पादकत्व र लगाइने बालीको प्रकृतिअनुसार मलको प्रयोग गर्नुपर्छ । पात टिपेर  खाने तरकारी रायो, स्विसचार्ड, पालुङ्गो, बन्दा, ब्रोकाउली आदिलाई नाइट्रोजनको बढी आवश्यकता पर्छ । त्यसै गरी फल खाने बालीहरू फर्सी, काँक्रो, खुर्सानी, टमाटर, भन्टा, खरबुजा आदिलाई फस्फोरसको बढी आवश्यकता पर्छ । कोसे तरकारीहरू बोडी, सिमी, केराउ, भटमास, बकुल्ला आदिलाई नाइट्रोजनको बढी आवश्यकता पर्छ । जरेबालीहरू मुला, गाजर, सलगम, आलु, लसुन, प्याज आदिलाई पोटासको आवश्यकता पर्छ । यसरी करेसाबारीमा तरकारीको प्रकृतिअनुसार मलखादको जोहो गर्नुपर्छ । तरकारी हरियो हुने र तिनमा  पानीको मात्रा बढी हुनाले पानीबिना ती ओइलाउने  र  सुत्ने स्थिति आउँछ । त्यसै हुनाले बढी मात्रामा सिंचाइको आवश्यकता पर्छ । सामान्यतय बिउ उम्रने बेला बेर्ना  सरेका बेला, मलखादको प्रयोग लगत्तै, गोडमेलपश्चात् डुकु आउने,  फुल्ने र दाना लाग्ने बेला बिरुवालाई पानी नभई हुँदैन । बेर्ना सारेपछि कम्तिमा एक हप्ता नियमित रूपमा सिंचाइको व्यवस्था हुनु जरुरी हुन्छ । करेसाबारीमा नियमित रूपमा गोडमेल गर्नुपर्छ ।यसो गर्नाले लगाएको बाली फस्टाउनुका साथै झारपात उखेल्दा माटो खुकुलो पनि हुन्छ ।

             निष्कर्षमा के भन्न सकिन्छ भने यसरी खेती गर्दा प्रशस्त मात्रामा उत्पादन हुन गई आफूलाई चाहिने तरकारी आफैँ उत्पादन गर्न सकिन्छ । मलखाद प्रयोग, सिँचाइ र गोडमेलका बारेमा यस निबन्ध सरल सहज भाषाशैलीमा उपयुक्त तरिकाले सिकाइएको छ ।

ख) करेसाबारीको उपयोगबाट कस्ता फाइदा लिन सकिन्छ, आफ्नै शैलीमा चर्चा गर्नुहोस् ।

उत्तर :-    कृषि प्रधान देश नेपाल र नेपालीका हरेक घरका भान्सामा आयातित तथा रासायनिक एवं कीटनाशक औषधि प्रयोग भएका तरकारीले प्रश्रय पाउँदा एकातिर मानव स्वास्थ्यमा नकारात्मक असर पर्ने र अर्कोतर्फ भान्साको बढ्दो खर्चलाई कटौती गर्ने उद्देश्यले नेपाली पाठ्यपुस्तकका सम्पादकहरूद्वारा यस निबन्धमा करेसाबारीको प्रयोग वानस्पातिक विषादीको निर्माण बाली विविधता आदिको चर्चा गरिएको छ

            घरघरमा करेसाबारी व्यवस्थापन गर्न सकेमा ताजा तरकारी खान पाइने, तरकारीमा हुने खर्च बचत हुने, आफैँले उत्पादन गरेको हरियो, ताजा र विषादीरहित तरकारी प्रयोगले रोगबाट वचन सकिने , समयको सदुपयोग हुने, शारीरिक व्यायाम समेत हुने, आत्मनिर्भरताको  वृद्धि हुने, खेर गएको जमिन सदुपयोग हुने लगायतका फाइदा लिनका लागि करेसाबारी निर्माण तथा प्रयोग गर्नु पर्दछ । यसले आयातीत , बासी र विषादीयुक्त तरकारी खानु पर्ने बाध्यताबाट मुक्तिसमेत मिल्छ ।   थोरै जमिनबाट विभिन्न प्रजातिका तरकारी बालीबाट घरपरिवारलाई चाहिने आवश्यकता पूरा गर्न सकिन्छ ।यस्तो तरकारी खेतीको प्रयोगले वातावरण सन्तुलन राख्न सहयोग पुग्छ । घरबाट निस्किने फोहोरको पनि उचित रूपमा प्रयोग हुन्छ ।    

        निष्कर्षमा के भन्न सकिन्छ भने हामीले आफूलाई आवश्यक पर्ने ताजा तरकारी आफ्नै करेसाबारीमा उत्पादन गरि तरकारीका लागि आत्मनिर्भर बन्न सकिन्छ । जग्गाको सदुपयोग , समयको सदुपयोग, पैसाको बचत र निरोगी बन्ने मूल मार्ग नै करेसाबारी खेती हो । त्यसैले करेसाबारीमा खेती गरेर स्वस्थ जीवन जिउनु नै आजको मुख्य आवश्यकता हो ।